طريقة صنع المخمر او المخمار ديال الزنقة من يد المعلمة بالصور كالعادة
مرحبا اخواتي نتمنى تكونو في تمام الصحة و العافية ان شاء الله
اليوم ان شاء الله غادي نوريكم طريقة المخمر الي كنديرو فالمحلبة ديالنا نتمنى يعجبكم
ندوزو للطريقة
فبانيو كبير ديري الفينو و الفورص القياس متساوي قد الفينو قد الفورص و خلطيهوم بيدك مزيان حتى يتجانسو
من بعد زيدي سنيدة و الملح و الخميرة المعجونة
وزيدي الما دافي مع الجو بارد و خلطي الخليط و العجينة تكون مرخوفة شوية ماشي قاصحة ودلكيه شوية غير يتخلط الخليط و هكدا كيكون
و من بعد جمعيها مزيان فيديك و ديريها فوق الطابلة باش تخدمي
و كيف مكاتشوفو العجينة كتكون مرخوفة و كتبعك فيديك
ثم قطعيها كوريات متساوية
ثم وجدي الزبدة بزايد مع شوية ديال الزيت دايبين و الفينو و الفورص مخلطين للتوراق
من بعد كتبداي عملة الجميع وفكل لفة ديري الزبدة و الدقيق باش يجي المخمر مورق تبعو الطريقة بالصور
من بعد كتلويها 2 لويات و تخلي طريف من العجينة
و من بعد تشد طريفات العجينة
هنا جمعاتهوم فالوسط
وهادو الجناب الاخرين
وهاهو ما مجموعين فالوسط
و تقلبها و هاهي واجدة
و تكملي العملية نفسها لكل الكويرات و تخليهوم يخمرو شوية خصوصا دابة الجو بارد
يتبع
من بعد ما يخمرو الكويرات كتمسلي وحدة بوحدة و ديريهوم يطيبو فالمقلة الي موالفة طيبي فيها يعني وحدة بوحدة
وهنا راهوم كيطيبو ووحدين مزال
نخليكم مع الصور
وهاهوما واجدين و محمرين
ملي وجدو ديت معايا جويجات للدار للفطور و فتحتهوم من الداخل و زيدت شوية ديال الزبدة بلدية مع العسل و سخنتهوم و اكيد مع كويس ديال اتاي اممم جاو ممتازين مذاق رائع
بالصحة و الراحة
نتمنى الموضوع يعجبكم و متنساونيش من دعيوات الخير اخواتي الف شكر
منقول
المصدر: المغرب - Morocco - من قسم: المطبخ المغربي
الله يعطيك الصحه 
العرض العادي
